फॅन्सी नंबरप्लेटला करा बाय; जाऊ शकतो परवाना

तुमच्या दुचाकीची किंवा कारची नंबरप्लेट फॅन्सी प्रकारातील असेल, तर सावधान.... तुमचा परवाना रद्द केला जाऊ शकतो. मुंबई वाहतूक पोलिसांनी सर्व विभागीय आरटीओ कार्यालयांना तशा सूचना दिल्या आहेत. अशा फॅन्सी नंबरप्लेट असलेल्या दुचाकी किंवा कार या अगोदर सापडल्या असतील, आणि त्यांना सूचना देऊनही त्या व्यक्ती नंबर न बदलतात तशाच दुचाकी किंवा कार चालवताना आढलल्या तर त्यांचे परवाने रद्द करून टाकावेत अशी स्पष्ट सूचना वाहतूक विभागाने आरटीओंना दिल्या आहेत. जानेवारी ते ऑगस्ट अशा ८ महिन्यांच्या कालावधीत फॅन्सी नंबरप्लेट धारण करणाऱ्या २२७२ व्यक्तींना चलान पाठवण्यात आले होते. हे नंबरप्लेट देवनागरी आणि फॅन्सी पद्धतीने टाकण्यात आले होते. या सर्वांना टेक्ट मेसेज पाठवून वाहतूक पोलिसांनी अशा नंबरप्लेट बदलण्याच्या सूचनाही केल्या होत्या.

वाहतूक पोलिसांनी पकडलेल्या २२७२ पैकी ११ जण अशा नंबरप्लेटसह दुसऱ्यांदा आढळून आले असल्याचे मुंबई वाहतूक पोलीस दलाचे सहआयुक्त मधुकर पांडे यांनी सांगितले. अशा दुसऱ्यांदा पकडण्यात आलेल्या लोकांचे परवाने रद्द करण्याविषयीच्या सूचना आम्ही आरटीओ कार्यालयांना दिल्या असल्याची माहिती पांडे यांनी दिली. हे अकरा जण दुचाकीस्वार असल्याची माहितीही त्यांनी दिलीय.

फॅन्सी नबरप्लेट वापरल्यास वाहनधारकाला १००० रुपयांचा दंड आकारण्यात येतो. विशेष म्हणजे राजकीय नेते, नगरसेवक, त्यांचे कार्यकर्ते अशांचा ओढा अशा फॅन्सी नंबरप्लेट वापराकडे अधिक असल्याचे आढळून आले आहे. 'दादा' आणि 'बाबा' अशा प्रकारातील नंबरप्लेट अधिक प्रमाणात आढळून येत आहेत सन २०१८ मध्ये एकूण ९०३७ दुचाकीस्वारांचे परवाने रद्द करण्याच आल्याची माहिती आरटीआय कार्यकर्ते त्रिवणकुमार कर्नानी यांनी दिलीय.

सर्व भाषिक लोकांच्या चटकन लक्षात यावेत यासाठी गाड्यांवरील नंबरप्लेट या इंग्रजीमध्ये असतात. बाहेरील राज्यातून एखादी गाडी आपल्या राज्यात आली आणि ती व्यक्ती एखाद्या गुन्ह्यात सहभागी असेल, तर इतर भाषेत असलेली नंबरप्लेट वाचताना अडचण येऊ शकते असे एका वाहतूक पोलिसाने सांगितले.